पालघर अंडर-16 फुटबॉल खेळाडूचा मृतदेह जंगलात; परिसरात खळब
पालघर | प्रतिनिधी ; पालघर जिल्ह्यातील मेंढवण खिंड परिसरातील दाट जंगलात मुंबईच्या अंडर-16 फुटबॉल संघात नाव कमावलेल्या एका तरुण खेळाडूचा मृतदेह आढळून आल्यानं मोठी खळबळ उडाली आहे. सागर सोरती असे या खेळाडूचं नाव असून, शनिवारी सकाळी जंगलातून जाणाऱ्या स्थानिकांना एका झाडाला गळफास घेतलेल्या अवस्थेत त्याचा मृतदेह दिसून आला. त्यांनी तत्काळ याची माहिती कासा पोलीस ठाण्यात दिली. पोलिसांनी घटनास्थळी धाव घेऊन पंचनामा केला आणि मृतदेह शवविच्छेदनासाठी पाठवला.
या घटनेमागे आत्महत्येचा प्राथमिक अंदाज पोलिसांनी व्यक्त केला असला, तरी सागरच्या अचानक मृत्यूमुळे क्रीडा क्षेत्रात शोककळा पसरली आहे. मुंबईच्या अंडर-16 संघातून त्याने उत्तम कामगिरी केली होती आणि पुढील काही महिन्यांत राज्यस्तरीय स्पर्धेत चमक दाखवण्याची त्याची तयारी सुरू होती. मेहनती, शिस्तबद्ध आणि प्रतिभावान खेळाडू म्हणून त्याची ओळख होती. त्यामुळे इतक्या कमी वयात त्याचा मृत्यू झाल्याने सहकारी खेळाडू, प्रशिक्षक आणि क्रीडाप्रेमी स्तब्ध झाले आहेत.
सागरच्या कुटुंबीयांना या घटनेचा जबर धक्का बसला असून त्यांनी पोलिसांकडे सखोल चौकशीची मागणी केली आहे. कुटुंबीयांनी सागरच्या वागणुकीत किंवा दैनंदिन जीवनात आत्महत्येचं कोणतंही संकेत दिसले नसल्याचा दावा केला आहे. त्यामुळे या मृत्यूमागील कारण नेमकं काय हे शोधणं पोलिसांसमोर मोठं आव्हान बनलं आहे.
कासा पोलिसांनी या प्रकरणाची नोंद अकस्मात मृत्यू म्हणून केली आहे. पुढील तपास सुरू असून सागरच्या मृत्यूबाबत कोणतंही संशयास्पद सूत्र आढळतंय का, हे शोधण्यासाठी पोलिस विविध अंगांनी तपास करत आहेत. तर दुसरीकडे, या दुर्दैवी घटनेमुळे फुटबॉल समुदायात हळहळ व्यक्त केली जात असून, एका उगवत्या प्रतिभेचं असं अकस्मात निधन झाल्यानं सर्वत्र दुःखाची लाट उमटली आहे.
